Orlofsmál

Allt launafólk á rétt á orlofi samkvæmt lögum og kjarasamningum. Starfsmaður ávinnur sér rétt til orlofs með vinnu fyrir atvinnurekanda á svokölluðu orlofsári, sem er tímabilið frá 1. maí til 30. apríl ár hvert. Samkvæmt lögum, skal veita orlof í einu lagi á tímabilinu frá 2. maí til 15. september, nema um annað sé samið. Lágmarksorlof er tveir orlofsdagar fyrir hvern unninn mánuð.

Orlofslaun eru greidd  í samræmi við áunninn rétt til orlofs á árinu og reiknast á hverja launagreiðslu, þannig að af heildarlaunum reiknast orlofslaunahlutfall viðkomandi starfsmanns, að lágmarki 10,17%.

Með hækkandi starfsaldri ávinna starfsmenn sér rétt til hærra hlutfalls og fleiri frídaga.

Orlofsuppbót

Orlofsuppbót er eingreiðsla sem atvinnurekendum ber samkvæmt kjarsamningi að greiða starfsmönnum sínum ár hvert í tengslum við orlofstöku þeirra. Orlofsuppbótin er mishá eftir kjarasamningum.

Orlofshús og íbúðir

Stéttarfélög kappkosta að geta boðið félagsmönnum sínum aðgang að orlofshúsum vítt og breitt um landið, á verði sem flestir eiga að ráða við. Einnig færist það í vöxt að félög eigi íbúðir í þéttbýliskjörnum og fer það þá oftast eftir því hvar á landinu félögin starfa, hvar íbúðirnar eru. Félög á suðvesturhorninu eiga t.d. flest íbúðir á Akureyri en félögin fyrir norðan eiga íbúðir í Reykjavík. Ekki er leyfilegt að hafa gæludýr í sumarhúsum eða orlofsíbúðum félagsins.

Ýmsir aðrir kostir

Flugávísanir með Icelandexpress. Stéttarfélagið kaupir gjafabréf sem það endurselur til félagsmanna og geta þeir notað þessi bréf til að greiða með ferðir til allra áfangastaða Icelandexpress. Ávísanirnar eru ekki seldar út á nafn en hafa kóda sem notaður er við bókun, hvort heldur er á netinu eða keypt er í gegnum síma. Ef ferðin er dýrari en ávísun þá greiðir félagsmaðurinn mismuninn og ef afgangur verður af ávísuninni, þá er hægt að nota hann upp í næstu ferð. Ávísanirnar gilda tvö ár fram í tímann.

Veiði og útilegukort eru nýjung hjá Stéttarfélagi Vesturlands og virðist ætla að vera vinsæll kostur þetta árið. Kortin eru seld á skrifstofu félagsins og eru verulega niðurgreidd. Hægt er að gista á 31 tjaldstæði og eins er hægt að veiða á 31 veiðistað.

Sumarferðir sem Stéttarfélag Vesturlands hefur farið í hafa verið vinsælar. Oftast er um dagsferðir að ræða í næsta nágrenni þar sem áhugaverðir staðir eru skoðaðir. Sérstök ferðanefnd er kosin á aðalfundi félagsins og sér hún um að skipuleggja þessar ferðir. Vel má vera að farið verði út í það að skipuleggja lengri ferðir. Mörg félög leggja í það að fara á hálendið og á staði þar sem félagsmenn myndu ekki ferðast á eigin vegum en geta gert það í skipulegum ferðum, sem þessum.